بنگلورو یکم مئی (ایس او نیوز) بنگلورو شہر کے کئی علاقوں میں گزشتہ رات کو جو موسلادھار بارش ہوئی اس سے عام زندگی درہم برہم ہوگئی ہے ۔ طوفانی ہوا کے ساتھ بارش ہونے کی وجہ سے شہر کے کئی علاقوں میں درخت گر گئے جس کے سبب مالی نقصان پہنچا ہے ۔

بنگلورو ایسٹ ، ساؤتھ اور بمن ہلی علاقوں میں گرج کے ساتھ ہوئی زبردست بارش کے سبب سڑکیں تالاب میں تبدیل ہوگئیں ، جس سے گاڑی سواروں کو پریشانیوں کا سامنا کرنا پڑا ۔ کئی درخت بجلی کی تار پر گرنے کی وجہ سے کئی علاقوں میں رات بھر بجلی منقطع ہوگئی ۔ اس کے علاوہ درختوں کے قریب پارک کی گئی کاروں اور آٹو رکشا کو بُری طرح نقصان پہنچا ہے ۔

کورمنگلا ففتھ بلاک 18 واں مین ، اندرا نگر 80فیٹ روڈ ، بیگور روڈ، آڈوگڈی 11 ویں مین روڈ ، ایچ ایس آر لے آؤٹ ، تپاسندرا پوسٹ آفس، ڈیفنس کالونی ، شیواجی نگر، وویک نگر پولیس تھانہ کے روبرو، ہلی ماؤ کے وجئے بینک کالونی کے قریب درختوں کی شاخیں گری ہوئی پائی گئیں ۔

جسے ہٹانے کیلئے بروہت بنگلورو مہانگر پالیکے (بی بی ایم پی ) کے عملہ کو جدوجہد کرنی پڑی ۔ درختوں کے گرنے سے کئی علاقوں میں ٹریفک میں خلل پڑا ۔ ہلی ماؤ کے قریب واقع وجئے بینک کالونی میں درخت گرنے کے سبب کار کو زدست نقصان پہنچا ہے ۔